Urban Volcano

Skáldskapur Barkar Sigurbjörnssonar

Urban Volcano er forlag sem gefur út myndskreyttar smásögur, örsögur og ljóð eftir Börk Sigurbjörnsson.

Börkur er áhugasamur sögumaður með næmt auga fyrir sérstökum sögupersónum, fyndnum samtölum og lifandi umhverfislýsingum. Skrif Barkar flokkast að mestu leyti undir raunsæisstefnu og sögurnar hans eru oftar en ekki byggðar á sönnum atvikum í lífi höfundarins. Þó sögurnar innihaldi fjölmörg sannleikskorn þá eru þau rækilega blönduð skáldskap sem vekur upp forvitni lesandans um það hvar mörkin liggi milli raunveruleika og skáldskapar. Ljóðasafnið inniheldur ferskeytlur, limrur og atómljóð.

Börkur fæddist í Reykjavík árið 1976 en hefur undanfarna tvo áratugi flakkað um heiminn í leit að menntun, atvinnu og ævintýrum. Hann hefur dvalið til lengri tíma í Amsterdam, Barcelona, Düsseldorf, London og Montevideo.

Fyrsta bók Barkar var smásagnasafnið 999 Erlendis sem kom út árið 2012 og segir sögur af Íslendingum á erlendri grund. Árið 2017 kom út örsagnasafnið 52 augnablik sem er afrakstur árslangs verkefnis þar sem höfundurinn birti myndskreytta örsögu í hverri viku. Smásagnasafnið Talaðu við ókunnuga kom út sumarið 2019 og segir, eins og titillinn gefur til kynna, frá samkiptum okkar við ókunnuga.

Sögurnar og ljóðin má að lesa á netinu en fást einnig sem rafbækur og kiljur í helstu vefverslunum. Auk íslensku þá eru margar sögurnar einnig til á ensku og spænsku.

Fylgið höfundinum á Goodreads til þess að fá tilkynningar um verk hans um leið og þau koma út.